Posts
အခက်ခဲဆုံး အပင်ပန်းဆုံးကာလတွေကိုဖြတ်သန်းနေတုန်းမှာပဲ ချစ်ရတဲ့မိတ်ဆွေတချို့မှာ ကိုယ့်တန်ဖိုး ကိုယ့်အလှကိုယ်မမြင်ပါဘဲ ဘာမှအနှစ်သာရမရှိလှတဲ့ဟန်ဆောင်ပုံစံတွေ သကာဖုံးထားတဲ့ စကားလုံးတွေနဲ့ ကိုယ့်ကိုကိုယ်တည်ဆောက်ယူလာကြတာကိုတွေ့နေရပါတယ်။ စကားတွေ အပြုံးတွေ အကောင်းမြင်စာစုတွေဟာ ဆိုရှယ်မီဒီယာမှာပွစာကျဲနေပါတယ်။ ပေါများလွန်းတဲ့အဲဒီဟန်ဆောင်မျက်နှာဖုံးတွေထဲမှာ တချိန်က ရိုးသားတဲ့အပြုံးတွေ ရိုးရှင်းပွင့်လင်းတဲ့စကားပြောသံမာမာကြည်ကြည်တွေပျောက်ဆုံးလာနေကြပါတယ်။ တချို့က မိမိရဲ့ ပင်ကိုယ်ပုံစံတခုကို ဟန်ရယ် အလှတခုရယ်လို့မသတ်မှတ်ဘူး။ တောကျတယ်ဆိုတဲ့အများတကာအပြောအဆိုလွတ်အောင် ပြောင်းလဲပစ်လိုက်ကြတယ်။ အဆင်ပြေညီညွတ်သွားတဲ့သူတွေလည်းရှိသလို မတော်တဲ့အင်္ကျီဝတ်ထားသလိုဖြစ်နေတဲ့သူများကိုလည်းမြင်ရတယ်။ ဒါကိုလည်း အခြားသူကပြောတာကိုလိုက်ခံစားနေတာထက် ကိုယ်တိုင်က ကိုယ့်ကိုကိုယ်မြင်အောင်ကြည့်၊ ကိုယ်ပြောင်းယူလိုက်တဲ့ပုံစံက ကိုယ့်အစစ်အမှန်ပုံရိပ်ဟုတ်မဟုတ်ကိုပဲဆန်းစစ်စေချင် မြင်လိုက်စေချင်တာပါပဲ။ ကိုယ်ကဘယ်သူ့ကို အိုင်ဒေါယူလိုက်မိတာလဲပြန်ဆန်းစစ်။ ကိုယ်အိုင်ဒေါယူထားတဲ့သူကရော သူ့ရဲ့ ပင်ကိုယ်အစစ်အမှန်ဆိုတာထက်လူအများအမြင်တင့်တယ်အောင်ပြနေတာလား လူအများမသိအောင်ဖုံးကာပြီး အပေါ်ယံလုပ်ယူနေရတဲ့သူလား ပြန်ဆန်းစစ်ရမှာပဲ။ ဒါလည်း ပြောသလောက်သိပ်တော့မလွယ်နေပါဘူး။ လူတွေဟာ မာယာများကြပါတယ်။ သူတို့ကိုယ်တိုင်တောင်မသိလိုက်ပဲ လိမ်ညာဖုံးကွယ်နေနေကျသူတွေကို ကိုယ်ကမြင်အောင်ကြည့်နိုင်ဖို့ဆိုတာလွယ်တဲ့ကိစ္စတော့မဟုတ်ပါဘူး။ ဒါပေမယ့် အတွင်းသား သိစိတ် ဆိုတာဟာ လှစ်ဟပြတတ်တဲ့ သဘာဝရှိပါတယ်။ အဲဒါကိုမြင်အောင်ဆန်းစစ်တတ်မယ်ဆိုရင် ကိုယ်ကလေးစားအားကျလို့ အတုယူမယ့်သူရော ကိုယ်ကိုယ်တိုင်ရောဟာ ကိုယ်တိုင်တောင်မသိအောင်ဖုံးကွယ်ဟန်ဆောင်နေကြသလား အစစ်အမှန်အလှတရားဟာ လုပ်ယူထားခြင်းမဟုတ်တဲ့တကယ်ရိုးသားခြင်းလားဆိုတာမြင်လာမှာပါ။ အချိန်တခု ရင့်ကျက်မှုတခုတော့ ပေးဆပ်ရကောင်းပေးဆပ်ရနိုင်ပါတယ်။ မိမိရဲ့ ကိုယ်ပိုင်အလှတရားနဲ့အဆင်ပြေညီညွတ်နိုင်ကြပါစေလို့ မင်္ဂလာနှစ်သစ်အတွက်ဆုတောင်းလိုက်ပါတယ်။
